“މާލެއަކީ ރީތި، ޗާލު ސިޓީއަކަށް ހަދަން ސްޓެލްކޯއިން އަބަދު ވެސް މަސައްކަތް ކުރޭ”

Read Time:3 Minute, 23 Second

މާލެސިޓީއަކީ ޒީނަތްތެރި، ރީތި އަދި ޗާލު ސިޓީއަކަށް ހެދުމަށް ސްޓެލްކޯއިން އަބަދު ވެސް މަސައްކަތް ކުރަމުން އަންނަ ކަމަށް އެކުންފުނީގެ މެނޭޖިންގް ޑިރެކްޓަރު، ހުސެއިން ފަހުމީ ވިދާޅުވެއްޖެއެވެ. ސްޓެލްކޯގެ ސަބް ސްޓޭޝަންތަކާއި މަގުމަތީގައި ހުރި ޑިސްޓްރިބިއުޝަން ފޮށިތަކުގައި ތަތްކޮށްފައިވާ އިޝްތިހާރު ފަދަ ތަކެތި ނައްޓައި، ސަބް ސްޓޭޝަންތަކާއި ޑިސްޓްރިބިއުޝަން ފޮށިތައް ސާފުކުރުމަށް ކުންފުނީގެ މުވައްޒަފުން ހިންގާ ‘ޗާލު ވެށި – މަގޭ ޒިންމާ’ ޙަރަކާތް ފައްޓަވާދެއްވައި ވާހަކަ ދައްކަވަމުން ފަހުމީ ވިދާޅުވީ، ދެކެން ބޭނުންވަނީ މާލެއަކީ ޒީނަތްތެރި، ރީތި އަދި ޗާލުއަކަށް މާލެ ވުން ކަމަށެވެ.

ދުނިޔޭގެ އެހެން ކެޕިޓަލް ސިޓިތަކަށް ޗާލު ރީތި ސިޓީތަކޭ މީހުން ބުނާ ފަދައިން ރާއްޖެއަށް ޒިޔާރަތް ކުރާ މީހުންގެ ތެރެއިން މާލެއަށް އަންނަ މީހުން ވެސް މާލެއަކީ ޒީނަތްތެރި ތަނެކޭ ބުނުވަން އެކުންފުނިން އަބަދު ވެސް ބޭނުންވާ ކަމަށް ފަހުމީ ވިދާޅުވިއެވެ. “އަޅުގަނޑުމެން ދެކެން ބޭނުން މާލެއަކީ ޒީނަތްތެރި، ރީތި، ޗާލު މާލެއަކަށް ވާން. ދުނިޔޭގެ އެހެން ކެޕިޓަލް ސިޓީތަކަށް ޗާލު ރީތި ސިޓީތަކޭ މީހުން ބުނާ ގޮތަށް، މި ސިޓީއަށް ޒިޔާރަތް ކުރާ މީހުން ވެސް މާލެއަކީ ޒީނަތްތެރި ތަނެކޭ ބުނުވަން ސްޓެލްކޯއިން އަބަދުވެސް ބޭނުން.” ފަހުމީ ވިދާޅުވިއެވެ.

އެކަން ހާސިލުކުރުމަށްޓަކައި، ގެދޮރުތަކާއި މަގުތަކާއި ހިދުމަތްދޭ ޓްރާންސްފޯމަރުތައް ޒީނަތްތެރިކޮށް ރީތިކޮށް ހުންނަން ޖެހޭ ކަމަށާއި މިއަދު މި ފެށޭ ޕްރޮގްރާމަކީ އެކަމަށްޓަކައި ފެށޭ ޕްރޮގްރާމެއް ކަމަށް ފަހުމީ ވިދާޅުވިއެވެ. މިއަދު މި ފަށާ ޕްރޮގްރާމަކީ ކުންފުނީގެ މުވައްޒަފުން ކުރާ މަސައްކަތެއް ކަމަށާއި އެ މަސައްކަތް މިއަދު ކުރުމަށްފަހު ހުއްޓާނުލާނެ ކަމަށާއި އަމާޒު ހާސިލު ކުރެވެންދެން އެމަސައްކަތް ކުރާނެ ކަމަށް ފަހުމީ ވަނީ ވިދާޅުވެފައެވެ.