Read Time:2 Minute, 38 Second
(ފޮޓޯ ކްރެޑިޓްސް: ޕީއެސްއެމް ނިއުސް)
މަރުކަޒީ ބޭންކު (އެމްއެމްއޭ) ގެ ތަފާސްހިސާބުތަކުން ދައްކާގޮތުގައި، ދައުލަތުގެ ބޮޑެތި ދަރަނިތަކެއް ދެއްކުމާ ގުޅިގެން ރަސްމީ ރިޒާވާއި ބޭނުންކުރެވޭ ރިޒާވް ވަނީ ބޮޑުތަނުން ދަށްވެފައެވެ. އެޕްރީލް މަހުގެ ނިޔަލަށް ރަސްމީ ރިޒާވް 717.9 މިލިޔަން ޑޮލަރަށް ތިރިވެފައިވާއިރު، މިއީ މާރިޗު މަހާ އަޅާބަލާއިރު 46 އިންސައްތައިގެ ދަށްވުމެކެވެ. މި ބަދަލު އައީ އެޕްރީލް މަހު އެކަނިވެސް ދަރަނީގެ ގޮތުގައި 924 މިލިޔަން ޑޮލަރު ދައްކާފައިވާތީއެވެ. މީގެ ތެރޭގައި 2021 ވަނަ އަހަރު ނެގި 500 މިލިޔަން ޑޮލަރުގެ ސުކޫކާއި އިންޑިއާއިން ހަމަޖެއްސި 400 މިލިޔަން ޑޮލަރުގެ ކަރަންސީ ސްވޮޕް ފެސިލިޓީ ހިމެނެއެވެ.
ދަރަނިތައް އަދާކުރުމަށްފަހު ބޭނުންކުރެވޭ ރިޒާވުގައި މިހާރު ހުރީ 244.2 މިލިޔަން ޑޮލަރެވެ. މިއީ މާރިޗު މަހު ހުރި 409 މިލިޔަން ޑޮލަރާ އަޅާބަލާއިރު 40 އިންސައްތަ މަދު އަދަދެކެވެ. ސަރުކާރުން ހާމަކުރައްވާފައިވާ ގޮތުގައި މި ދަރަނިތައް ދައްކާފައިވަނީ ސޮވެރިން ޑިވެލޮޕްމެންޓް ފަންޑާއި ރިޒާވް ބޭނުންކޮށްގެންނެވެ. ރައީސުލްޖުމްހޫރިއްޔާ ވިދާޅުވި ގޮތުގައި އިތުރު ދަރަންޏެއް ނުނަގައި އަދި އެއްވެސް ކަމަކަށް ދަތިނުވާނޭހެން ދަރަނިތައް ދެއްކުމަކީ ލިބުނު ކާމިޔާބީއެކެވެ. އަދި ބޭރުގެ ގައުމުތަކާ އޮންނަ ގުޅުމުގެ ތެރެއިން ދަރަނި ދެއްކުމުގައި އިތުރު ލުއިތައް ހޯދުމުގެ މަސައްކަތްވެސް ސަރުކާރުން ދަނީ ކުރަމުންނެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0