Read Time:2 Minute, 54 Second
(ފޮޓޯ ކްރެޑިޓްސް: ޕީއެސްއެމް ނިއުސް)
މިމަހުގެ 11 އިން 14 އަށް ވިލާ ނޯޓިކާގައި ބޭއްވި 21 ވަނަ އޭޝިއާ މީޑިއާ ސަމިޓަކީ ރާއްޖޭގެ މީޑިއާ ދާއިރާ ބައިނަލްއަޤްވާމީ ފެންވަރުގައި އައު އުސްމިންތަކަކަށް އުފުލައިދިން ތާރީޚީ ހަރަކާތެކެވެ. ދުނިޔޭގެ އެކި ކަންކޮޅުތަކުން ވަޑައިގެންނެވި މަންދޫބުންނަށް ދިވެހިން ކީ ހޫނު މަރުހަބާއާއި، ސަމިޓުގެ ފުރިހަމަ އިންތިޒާމުތަކުގެ ސަބަބުން ބައިވެރިންގެ ފަރާތުން ބޮޑު ތަރުހީބެއް ވަނީ ލިބިފައެވެ.
ސަމިޓުގެ ބައިވެރިން އެންމެ ބޮޑަށް ފާހަގަކުރީ ރާއްޖޭގެ ރީތިކަމުގެ އިތުރުން، ދިވެހިންގެ ހީވާގިކަމާއި ކަންކަން ރޭވުމުގައި ހުރި ފަންނީ ފުރިހަމަކަމެވެ. ވަކިން ޚާއްސަކޮށް، ރިސޯޓެއްގެ މާހައުލުގައި ޒަމާނީ ޓެކްނޮލޮޖީއާއި އިންޓަނެޓްގެ ޚިދުމަތްތައް ފުރިހަމައަށް ލިބެން ހުރުމަކީ ރާއްޖޭގެ ޑިޖިޓަލް އިންފްރާސްޓްރަކްޗާ ކުރިއަރާފައިވާ މިންވަރު ދައްކުވައިދޭ ކަމެއްގެ ގޮތުގައި ބައިވެރިން ސިފަކުރިއެވެ.
މި ސަމިޓުގައި ކުރިއަށްދިޔަ ސެޝަންތަކަކީ އިލްމީ ގޮތުންނާއި ފަންނީ ގޮތުން މުހިންމު މަޢުލޫމާތުތަކެއް ލިބިގެންދިޔަ ބައްދަލުވުންތަކެކެވެ. މީގެ ތެރޭގައި މީޑިއާގެ ސިޔާސަތުތަކާއި، އާޓިފިޝަލް އިންޓެލިޖެންސް (އޭއައި) މީޑިއާގައި ބޭނުންކުރެވޭނެ ގޮތްތަކާ ގުޅޭގޮތުން ކުރެވުނު މަޝްވަރާތައް ބައިވެރިންނަށް ވަރަށް ބޮޑަށް ކަމުދިޔައެވެ. އޭއައިބީޑީއާއި ޕީއެސްއެމް ގުޅިގެން ބޭއްވި މި ސަމިޓުން ރާއްޖޭގެ މީޑިއާ ދާއިރާގެ ޤާބިލުކަން ދުނިޔެއަށް ހާމަވެ، މިއީ އެހެން ޤައުމުތަކަށް ނަމޫނާ ސަމިޓަކަށް ވެގެން ގޮސްފައިވެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0