ރައީސް ކުޑަރިކިލުގެ ރައްޔިތުންނަށް: “އަޅުގަނޑަށް ކުރި އިތުބާރުގެ ނަތީޖާ މިރަށުން ފެންނާނެ”

Read Time:5 Minute, 55 Second

ކުޑަރިކިލުގެ ރައްޔިތުން އެމަނިކުފާނަށް ކުރެއްވި އިތުބާރުގެ ނަތީޖާ އެރަށުން ފެންނާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ ކުޑަރިކިލު ރައްޔިތުންނާ ބައްދަލުކުރައްވާ ދެއްކެވި ވަހަކަފުޅުގައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވާހަކަފުޅުގައި ރިޔާސީ އިންތިޚާބުގައި ކުޑަރިކިލަށް ވަޑައިގެން ރައްޔިތުން ބޭނުންވާ ކަންކަމުގައި ވަޢުދުތަކެއް ވެވަޑައިގެންފައިވާނެކަމަށް ވިދާޅުވިއެވެ. ރައީސް ވިދާޅުވީ، އިންތިޚާބުގައި އެމަނިކުފާނަށް ކުރެއްވި އިތުބާރުގެ ނަތީޖާ ދައްކަވައިދެއްވާނެކަމަށާއި، މިހާރު ކަންކަން ތަރުތީބުކުރެވިފައިވާގޮތުން ކުޑަރިކިލުފަދަ ހުރިހާ ރަށެއްގައިވެސް ކުރަންޖެހޭ ކަންކަން ކުރުމަށް ތައްޔާރުވެފައިވާކަމަށެވެ.

ރަށްރަށުގައި މަޝްރޫޢުތައް ކުރިއަށް ގެންދިއުމަށް މީގެ ކުރިން ދިމާވި ދަތިތައް މިހާރު ހައްލުކޮށް ކުރިއަށްދެވޭނެ މަގު ހޯދާފައިވާކަން ފާހަގަކުރައްވަމުން ރައީސް ވަނީ ހުރިހާ ވަޢުދެއް ފުއްދަވާނެކަމުގެ ޔަޤީންކަން ދެއްވާފައެވެ. އެގޮތުން ފުރަތަމަ ކަމަކަށް އެރަށުގައި ހުއްޓިފައިވާ ފެނާ ނަރުދަމާ ނިޒާމުގެ މަސައްކަތް ހުއްޓިފައި އޮތްއޮތުން ނިމުމަކަށް ގެނެސް، ކުރިއަށްދިއުމަށް ހުރިހާ ތައްޔާރީތަކެއް ނިމިފައިވާކަމަށްވެސް ރައީސް ވިދާޅުވިއެވެ. އެ މަސައްކަތް ފެށުމުގެ މަރުހަލާ މިހާރު ހާސިލްކުރެވިފައިވާތީ މިމަހު އެ މަސައްކަތް ފެށި ވަރަށް ބާރު ސްޕީޑުގައި ނުހުއްޓި ކުރިއަށްދާނެކަމަށް އެމަނިކުފާނު ވިދާޅުވިއެވެ. އަދި އެ މަސައްކަތް ގިނަވެގެން 6 މަސްތެރޭ އެއްކޮށް ނިންމަވާނެކަމަށްވެސް ރައީސް ވިދާޅުވިއެވެ. މީގެ އިތުރުން މަގު ހެދުމަށް ވެފައިވާ ވަޢުދު ފުއްދުމަށް އާރުޑީސީއާ ހަވާލުކޮށްފައިވާކަމަށާއި، ފެނާ ނަރުދަމާ ނިމުމާއެކު މަގު ހެދުން ފެށޭނެކަމަށްވެސް ރައީސް ވިދާޅުވިއެވެ.

“ފެނާ ނަރުދަމާ ނިމެމުންދާވަރަކަށް މަގު ހެދުން ފެށުމަށް ވަނީ ނިންމާފައި. އެކަން ކުރިއަށްދާނެ” ރައީސް ވިދާޅުވިއެވެ. ރައީސް ވިދާޅުވީ ރަށުގެ ސްކޫލުގައި މިހާރު ހުއްޓިފައިވާ މަސައްކަތްތަކެއް ހުރުމުން، އެކަންވެސް ފަށައި ބާރު ސްޕީޑުގައި ކުރިއަށް ގެންދަވާނެކަމަށެވެ. އެ މަސައްކަތް ނިންމާ މަލްޓި ޕާޕަސްހޯލެއްވެސް ތަރައްޤީކޮށްދެއްވާނެކަމަށް ރައީސް ވިދާޅުވިއެވެ. “ހަމައެފަދައިން ސިއްޙީ ނިޒާމުގެ ހަރުދަނާކޮށްދިނުމަކީވެސް އަޅުގަނޑުގެ ވަޢުދެއް. ސިއްޙީ ނިޒާމު ކުރިއެރުމަށް ސިއްޙީ މަރުކަޒު އަޕްގްރޭޑުކުރުން މި ފެށެނީ. އެމަސައްކަތްވެސް ރަނގަޅަށް ކުރިއަށްދާނެ” ރައީސް ވިދާޅުވިއެވެ.

ކުޑަރިކިލުގައި މިސްކިތެއް އެޅުމަށްވެސް ވަޢުދުވެފައިވާކަމަށާއި، ކައުންސިލުން ބިން ހަމަޖެއްޖެހުނުހާ އަވަހަށް އެ މަސައްކަތްވެސް ފެށޭނެކަމަށްވެސް ރައީސް ވިދާޅުވިއެވެ. އަދި ކުޅިވަރުގެ ދާއިރާއިން ވަސީލަތްތައް ޤާއިމްކުރުމަށް ކުރެވޭ މަސައްކަތުގެ ދަށުން ފުރިހަމަ ފުޓުބޯޅަދަނޑާއި، ފިޓްނެސް އެންޑް ރެކްރިއޭޝަން ސެންޓަރާއި، ހޭންޑް ބޯލް ކޯޓު އެޅުންވެސް ކުރިއަށްދާނެކަމަށް ރައީސް ވިދާޅުވިއެވެ. މިހުރިހާ މަސައްކަތްތައް ގާތުން ބައްލަވައި ރައްޔިތުން އެދޭގޮތަށް ފުރިހަމަކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.