“ކޮމަންވެލްތު ބީޗް ހޭންޑްބޯލް ގޭމްސްއަށް ކުޅުދުއްފުށީ ރައްޔިތުން ވަރަށް ރަނގަޅަށް ތައްޔާރުވާނެ”

Read Time:5 Minute, 52 Second

(ފޮޓޯ ކްރެޑިޓްސް: ކުޅިވަރާބެހޭ ވުޒާރާ)

ކުޅުދުއްފުށި ސިޓީގައި ބާއްވާ ކޮމަންވެލްތު ބީޗް ހޭންޑްބޯލް ގޭމްސްއަށް އެ ސިޓީގެ ހުރިހާ ރައްޔިތުންގެ އެއްބާރުލުން ލިބޭނެ ކަމަށާއި، އެކަމަށް ވަރަށް ރަނގަޅަށް ތައްޔާރުވާނެ ކަމަށް ކުޅުދުއްފުށި ސިޓީގެ މޭޔަރު މުޙައްމަދު އާތިފް ވިދާޅުވެއްޖެއެވެ. ރާއްޖޭގައި ބާއްވާ ފުރަތަމަ ބައިނަލްއަގވާމީ ބީޗް ހޭންޑްބޯލަ މުބާރާތް ކަމަށްވާ “ކޮމަންވެލްތު ބީޗް ހޭންޑްބޯލް ގޭމްސް” ބާއްވަން ނިންމާފައިވަނީ މި އަހަރުގެ ސެޕްޓެމްބަރު މަހުގެ 18-22 އަށް ކުޅުދުއްފުށީ ސިޓީގައެވެ. ކުޅުދުއްފުށި ސިޓީގެ މޭޔަރު އާތިފް ވިދާޅުވީ މިކަމުގައި ހޭންޑްބޯލް މޯލްޑިވްސް އާއި ކުޅިވަރާއި ހަށިހެޔޮކަމާ ބެހޭ ވަޒީރަށް ސިޓީ ކައުންސިލުން ފުރިހަމައަށް އެއްބާރުލުން ދެއްވާނެ ކަމަށެވެ.

އޭޝިއަން ހޭންޑްބޯލް ފެޑެރޭޝަނާއި، މޯލްޑިވްސް އޮލިމްޕިކް ކޮމިޓީ (އެމްއޯސީ) އާއި ކުޅިވަރާ ބެހޭ ވުޒާރާއިން މަޝްވަރާކުރުމަށްފަހު މި މުބާރާތް ކުޅުދުއްފުށީގައި ބާއްވަން ނިންމައި ކޮމަންވެލްތަށް ހުށަހެޅި ޕްރޮޕޯސަލް ބަލައިގެންފައިވާއިރު، ކުރިން ކޮމަންވެލްތު ބީޗް ހޭންޑްބޯޅަ މުބާރާތް ބާއްވަން އުޅުނީ މިދިޔަ އަހަރު ޕާކިސްތާނުގައެވެ. އެހެންނަމަވެސް އޭރުގެ ޕްލޭނާ އެއްގޮތަށް މުބާރާތް ބޭއްވޭ ގޮތެއް ނުވިއެވެ. ކޮމަންވެލްތު ބީޗް ހޭންޑްބޯޅަ މުބާރާތް ބޭއްވުމުގެ ޝައުގުވެރިކަން ރާއްޖޭގެ ހޭންޑްބޯލް މޯލްޑިވްސްއިން ފާޅުކޮށް ކޮމަންވެލްތަށް ރާއްޖޭން ހުށަހެޅި ޕްރޮޕޯސަލް ބަލައިގެންފައިވާއިރު، މިއީ ކޮމަންވެލެތުގެ ހުރިހާ ގައުމުތަކަށް ދައުވަތުދީގެން ކުރިއަށް ގެންދަން ނިންމާފައިވާ މުބާރާތެކެވެ. ރާއްޖޭގައި މި މުބާރާތް ބޭއްވޭތޯ ބެލުމަށް ހެދި ފީސިލިބިޓީ ސްޓަޑީއަށް ބިނާކޮށް ރާއްޖޭގައި މި މުބާރާތް ބޭއްވިދާނެކަމުގެ ފެހި ސިގްނަލް މިއަހަރުގެ ކުރީކޮޅު ކޮމަންވެލުތުން ވަނީ ރާއްޖެއަށް ދީފައެވެ.

ކުޅުދުއްފުއްޓަކީ ރާއްޖޭގައި މިވަގުތު ބީޗް ހޭންޑްބޯޅައަށް އެންމެ ފަހި މާހައުލެއް އޮތް ރަށަށްވާއިރު، އެ ރަށު ސިޓީ ކައުންސިލުން ވަނީ ހޭންޑްބޯޅައަށް ޚާއްސަ ބައިނަލްއަގުވާމީ ފެންވަރުގެ ދެ ކޯޓު އެ ރަށުގައި ތަރައްގީކޮށް، ލައިޓް ހަރުކޮށް ރޭގަނޑާއި ދުވާލުވެސް ކުޅެވޭނެ އިންތިޒާމުތައް ހަމަޖައްސާފައެވެ. ކުޅުދުއްފުށީ ސިޓީގެ މޭޔަރު އާތިފް ފާހަގަކުރެއްވި ގޮތުގައި ކޮމަންވެލްތު މުބާރާތް ވެގެންދާނީ ފަތުރުވެރިންގެ މަގުބޫލުކަން ހޯދުމަށް މީގެ ކުރިން ރާއްޖެއިން ބޭނުން ނުކޮށް އޮތް ގުދުރަތީ ރީތިކަމުގެ އިތުރު ފުރުސަތެއްގެ ބޭނުން ހިފަން ފެށޭ، އައު ފެށުމަކަށެވެ. “ދިވެހިރާއްޖެއަކީ ދޮންވެލި ތުނޑިތަކާއި މުރަކައިގެ ފަރުތައް ވިއްކައިގެން އިގްތިސާދު ބިނާ ކޮށްފައި ތިބި ބައެއް. މި ވަސީލަތްތަކުގެ ތެރެއިން ބޭނުން ނުކުރެވި ހުރި ބޮޑެތި ފުރުސަތުތައް އެބަހުރި، މި ފެށިގެންދަނީ އޭގެ އެއްފުރުސަތު ބޭނުން ކުރާތަން. ވަކިން ހާއްސަކޮށް މި ރީތި ދޮންވެލި ތުނޑިތަކުގެ” ރާއްޖޭގެ ރީތި ގޮނޑުދޮށްތަކަށް އިޝާރާތް ކުރައްވަމުން އާތިފް ވިދާޅުވިއެވެ.

ކޮމަންވެލްތު މުބާރާތް ކުޅުދުއްފުށީގައި ބޭއްވުމަކީ ރާއްޖެއަށް ފަތުރުވެރިން އަންނަ ބޭނުންވާ އިތުރު ސަބަބެއް އުފެއްދުން ކަމަށާއި، މިކަމުގެ ސަބަބުން އިގުތިސާދަށް ހެޔޮ އަސަރުކުރާނެ ކަމަށްވެސް އާތިފް ފާހަގަކުރެއްވިއެވެ.